عيدكم مبارك

رمضان كريم

البرود

البرود ده بقت حاله عامه بشوفها فى اغلب سلوكيات الناس فى كل مكان فى الشغل والدنيا لدرجة ان الموضوع ده استفزنى علشان اكتب عنه نفسى الناس تحس ويبقى عندها دم وتبطل تناحه بقى ....ده ماكانش اسلوب كلامى اللى بكتب بيه بس لما حد يحس بالبرود واللامبالاه من مشاعر اغلب الناس اللى حواليه وطريقة تفكيرهم وتصرفاتهم فى كل المواقف يبقى لازم يكون ده اسلوب الكلام ....وكفايه الكلام ده علشان لو كتبت اكتر من كده هغلط اوى من كتر اللى بشوفه ...كفايه ان اوجه رساله للناس دى انهم يخلوا عندهم دم شويه علشان يرحموا الناس اللى بتحس وعندها دم وحراااااااااااااااااااااااااااااااااام
بس كده كفايه

ياليتنى طفله واكبر همى لعبتى

wonderful

انت وطموحاتك

الطموح حاجه حلوه اوى بس طبعا لازم ليه تربه خصبه علشان الطموح تبقى موجوده زى الامل الدائم ...ساعات كتير الواحد بيلاقى اشياء بتكسر طموحاته وبيشوفها فعلا بتتكسر قدامه ....لازم يصبر ويتحمل ويعرف ان اكيد الحاجات دى هتعدى واكيد هيوصل بس المهم ان يكون عايز يوصل فعلا لطموحاته


كنت فاكره ان لما الشخص يحط لنفسه طموح صغيره ويحققها افضل من احط طموح كبيره واشوفها بتتكسر قدامى ....وساعتها الواحد يفكر يضحى بجزء من طموحاته او يقلل طموحاته او ييأس خالص بس مع مرور الوقت اكتشفت حاجات مهمه اوى


ان لو الواحد عايز يوصل للشمس هيوصلها ولو عايز يوصل للمكان اللى قدامه بس هيوصله
ان الواحد من غير طموحات يبقى ناقصه حاجات مهمه اوى فى حياته دى لو بقت حياه اصلا
ابسط حاجه هيفضل واقف فى نفس النقطه ويمر الزمن بيه وتاخده الحياه الروتنيه ...غير ان مش هيلاقى نفسه ودى حاجه مهمه اوى ومش هيستمتع بمتعة الانجاز

من الاخر اهم حاجه اننا نحط طموحات كبيره ونصبر عليها ونسعى اليها
الحمد لله جزء من طموحاتى اتحقق بس لما وصلت ليه حسيت ان لاقيت نفسى بس مش كلها جزء منها لازم اكمل بقيت الطموحات ولسه فاضل ليا طموحات كتير
نفسى اعلى واعلى واعلى لغاية ماالاقى نفسى كلها فى كل طموحاتى وتحقيقها بس ده صعب شويه علشان طموحاتى اعلى منى بس انا اقوى منها وهوصلها باذن الله

احلى الاوقات

السلام عليكم ورحمة الله وبركاته

انا بعشق البحر وبعشق السما وبعشق الطريق لانهم حياه

""انا ان شاء الله هغيب فتره تقريبا اسبوع او اكتر علشان مسافره اسكندريه من الاماكن اللى بعشقها بجد ..هتوحشونى وهيوحشنى قراءة المدونات وتعليقاتكم الجميله

هذه هى الحياه

السلام عليكم ورحمة الله و بركاته

اولا ارجو قبول اعتذارى عن الفتره الكبيره اللى انا مادخلتش فيها وده نظرا لظروف خارجه عن ارادتى فعلا

ندخل بقى فى الموضوع فى البوست اللى فات هذه هى الحياه

جت شوية اسئله فى بالى وكتبتها.... الاسئله دى حسيت انها زى ماكتبت عنوانها بالظبط ان دى هى الحياه وطبعا اجابات الاسئله تختلف من شخص لاخر على حسب حياته وشخصيته بس انا قعدت افكر كتيييييييير على اجابات الاسئله دى والحمد لله لاقيتها احيانا الانسان بيبقى تايه شويه بس فى الاخر لما بيواجه نفسه باسئله معينه بيلاقى الطريق الحمد لله

نيجى بقى نجاوب لان انا فعلا طولت كده

هذه هى حياتى

من الذى يرسم حياتى ؟؟؟ ...الله ...الله هو الذى يرسم حياتنا

الله الذى يرسم حياتى وليس انا التى ارسمها بيدى لان لا حول ولا قوة الا بالله ....فهو الذى رسم حياتى قبل ان اجئ الى هذه الدنيا وهو الذى يرسمها بقدرته فى التحكم فى حياتى وارى حكمة الله فى هذا الطريق الذى اسير فيه بامره فكل شئ بقدرته وبامره ولكن لا اتجاهل اننا بنرسم حياتنا بايدينا كجزء من التخطيط لحياتنا لان احنا بنفكر بعقلنا ونرسم مستقبلنا الذى نسير فيه ولكن هذا الرسم والتخطيط يعتبر شكليا او غير مباشر لان الله هو الذى يلهمنا هذا التفكير والتخطيط إذا الذى يرسم حياتنا بالفعل هو الله

من الذى يلونها ؟؟؟

احبائى واعدائى

الذين يحبونى والذين يكرهونى

فالذين يحبونى يساهمون فى تلوين حياتى ولكن بالوان مبهجه جميله مشرقه باختلاف درجاتها ومدى محبتهم لى

والذين يكرهونى يلونون حياتى بالوان قاتمه حزينه ليس لها معنى فى هذه الرسمه ولكنى اتعلم منها اشياء كثيره ...لست ارغب فى النظر الى هذه الالوان ولكن بوجودها تجبرنى على التعلم من وجودها فى رسمة حياتى

ماالوانها ؟؟؟

الوان هذه الرسمه كثيره بالنسبه لى يوجد بها كثير من الدرجات المختلفه ولكن ساذكر بعضها

يوجد بها الابيض ...( الفطره )وذلك بحبى لله والاسلام والفطره التى ولدت عليها فطرة الاطفال وطبيعتهم الجميله ولكن هذا اللون يقل عندما يمر علينا الزمان وارى جميع الاشياء من حولى غير التى كنت اراها من قبل واتصورها وانا طفله صغيره لا ادرك شيئا من حولى ولكن احاول ان ازيد من هذا اللون بحياتى واتحدى اى شئ يقلل من هذا اللون النقى

وعندما يمر الزمان تظهر هذ الالوان

الاحمر ... اللون ده متناقض فى معناه لدى احيانا اراه يدل على الحب والبهجه وقوة العاطفه عندما اراه فى الازهار المبهجه والوان العصافير و الاسماك واحيانا اراه بلون الدماء التى تنزف كل يوم بسبب الظلم والعنف

الاصفر....لون احبه جدا لان اشعر به عندما ارى ضحكات الاطفال والوان ملابسهم والعابهم وشروق ودفئ الشمس ورمال الصحراء الناعمه ...بحبه جدا علشان لون الكتكوت الاصفر الجميل الصغير الرقيق الضعيف ولكن جميل ...الاصفر يجعلنى اشعر بالسعاده والانطلاق والبهجه والطفوله

اللبنى والازرق بدرجاتهم ....من افضل الالوان لدى لان باختصار شديد انا بعشق البحر وبعشق السما

البرتقالى .... اشعر بالبهجه لوجوده فى هذه الرسمه

الاخضر .....احبه بدرجاته اراه فى المساحات الخضراء الشاسعه اشعر بالراحه عندما انظر اليه ارى فى معناه لدى الخير الكثير ومرتبط عندى جدا بلون السبحه و المساجد والزخارف الاسلاميه

البمبى ...اتمنى ان ارى حياتى كلها بهذا اللون الرقيق لانه يمثل ما بداخلى

الباذنجانى والبنفسجى بدرجاته ...بميل ليه ولاختياره ولكن لا ادرى لماذا ...وبفضله فى الوان الاحجار الكريمه

البنى ....يشعرنى بالقوه وشموخ وثبات وعلو الجبال

الاسود ....هذا اللون يزداد مساحته عندما ارى الظلم والغموض والغدر والخيانه والذين يكرهونى يلونون بهذا اللون ولكن لا اسمح له بوجوده لان ساطمس به الذكريات والاحاسيس المؤلمه وامحوه من هذ الرسمه لتظل مليئه بالالوان المبهجه واحتفظ بها لانها من تلوين احبائى

اهلا اهلا بالعيد ..هيه هيه هيه:)

ان شاء الله اليوم يوم عرفه ياريت كلنا نصومه وناخذ ثوابه ...ربنا يغفر لنا سنه قبل هذا اليوم وسنه بعدها ...اللهم اميييييييييييييييييين

ولا ننسى صلاة العيد اللى هى اجمل حاجه فى العيد كله والتكبير والدعاء للامه الاسلاميه وان ربنا يوفق جميع الناس اللى فى الامتحانات ويعينهم على المذاكرهوبعدها نحضر ذبح الاضحيه لان لها ثواب عظيم ..واحلى حاجه بعد ده كله هنقابل كل اللى بنحبهم والاقارب والاهل والاصحاب

انا حبيت اكتب لكل المدونين اللى بحبهم وبحب افكارهم وبحترمهم

كل عام وانتم بالف خير وسعاده وامل وتفاؤل :))

اعتذار

السلام عليكم ورحمته وبركاته

ازيكم ؟؟؟ وحشتونى بجد ...ووحشتنى زيارة وقراية مدوناتكم ... انا بعتذر لان عارفه انا مقصرة فى المتابعه والسؤال ...لكن هى ظروف بس الحمد لله خير ....والفتره اللى جايه دى هغيب شويه الله اعلم اد ايه بس ربنا يسهل وتكون قصيره ....وان شاء الله اول ما هرجع هتابع تانى زى الاول وهكتب وحاجات كتيييييير .....بس ادعولى عامة

تحياتى لكل زائرى المدونه

هذه هى الحياه

هذه هى الحياه رسمه مليئه بالألوان

..فمن الذى يرسم حياتك ؟؟.. ومن الذى يلونها ؟؟ ...وما الوانها ؟؟؟؟؟

نور الإسلام

الحمد لله انا ومجموعه جميله اجتمعنا على فعل الخير وربنا جعلنا مترابطين ولينا هدف واحد واجتمعنا على حب الله لكى نتعاون ونعتصم بحبل الله ونفعل الخير وهذا فضل من عند ربنا كبير ان الواحد يلاقى ناس بتحب فى الله بجد .. اخوات فى الاسلام

بسم الله الرحمن الرحيم

"واعتصموا بحبل الله جميعا ولا تفرقوا "

" تعاونوا على البر والتقوى ولا تعاونوا على الإثم والعدوان "

صدق الله العظيم

..الله الاسلام دى كلمه جميله اوى ليها معانى كبيره وعظيمه ..الاسلام له نور من انعم عليه الله بنور الاسلام فقد فاز فوزا عظيما كسب راحه ونعيم فى الدنيا والاخره راحه دائمه لا يشعر بها غير من اهتدى بهذا النور ويشعر برضا النفس ورضا الله عليه ويعلم انه هو الحق ويرزقه الله الثبات فى كل شئ من اول ثبات فى القول والفعل والابتلاءات والمواقف الصعبه والاختبارات والشدائد و ....لغاااااااااااية الثبات على الصراط المستقيم

علشان كده ربنا اكرمنا بهذه الفكره الجميله الخيره و هى مدونة نور الإسلام ستكون باللغه العربيه والإنجليزيه بإذن الله وهدفها :

أولا : أن نرى الله بقلوبنا وعقولنا فهو الظاهر والباطن ..الظاهر فعله والباطن ذاته

ثانيا : ان نعلم مدى جمال الدين الإسلامى وانه دين حق وقوى ورائع وملئ بالسماحه والحب والخير ويدعو الى السلام وإصلاح كل شئ قلوبنا وانفسنا ومجتمعنا فهو نعمه من الله ليس مجرد عبادات فقط لا بل فيه راحه وإصلاح و نور وحق وعدل حتى العبادات تكون لهذا الهدف الجميل

ثالثا : ان تكون ردا لاى اساءه للاسلام او لرسوله او لاى فهم خاطئ فى حق هذا الدين لأنه ارقى من ان يساء وأن ديننا يدعونا الى تقبل الاخرين وتقبل جميع الأديان دون الإساء لهم ...ولكن عندما يساء إلى ديننا يجب أن نفعل شيئا وقد أرى إن هذه المدونه ردا بسيطا لمثل هؤلاء الذين يجهلون مايقولوه

اتمنى ان تشاركونا بأرائكم ومناقشاتكم وزيارتكم التى سوف نسعد بها ونشر هذه المدونه

وأتمنى من الله أن نكون جديرين بهذه المسؤليه الكبيره ونستطيع ان نصل إلى هدفنا ويوفقنا الله على هذا اللهم أميييييييييييييييييييييين

ماحوظه : معلش انا قفلت الكومنت فى البوست ده فقط واتمنى اللى عايز يعمل كومنت يعمله فى نور الاسلام وهنرد عليه هناك ان شاء الله

أحيانا يكون الصمت أبلغ من الكلام 1

وداعا لاجمل شهر فى السنه ... وعيد سعيد

السلام عليكم ورحمة الله وبركاته

البوست ده هيبقى بوستين فى بوست .. بوست لانتهاء رمضان وده مهم جدا ويارب يكون مفيد وخفيف وبوست للعيد علشان بهنئ اخواتى الأعزاء فى عالم التدوين

شهر رمضان خلص وانتهى.. والحمد لله سمعت كذا خطبه قالوا كلام فعلا اثر فيا حبيت اكتبه ليكم وياااارب يأثر فينا كلنا ونعمل بكلامه علشان نبقى زى ما ربنا قال خير امه اخرجت للناس

اول و اهم نقطه اننا ندعى من ربنا لقبول اعمالنا وننشغل بالنقطه دى اكتر من انشغالنا بعمل الخير نفسه..لان ممكن يكون فى ذنب احنا عملناه بسببه اى عمل نعمله لا يقبل ..وكمان نقطة الرياء من النقط اللى بتمنع قبول العمل حتى ولو جبال من اعمال الخير والعبادات...اللهم تقبل اعمالى وعبادتى واعوذ بك من الرياء فى العمل وتكون النيه خالصه لوجهك الكريم...اللهم امين

تانى نقطه اننا ناس ربانيون لا رمضانيون ... يعنى احنا بنعبد ربنا لا اله الا هو فى كل الشهور والاماكن والاوقات ..يعنى مش فى رمضان بس لا وباقى حياتنا كلها ..اللهم يامقلب القلوب ثبت قلبى على دينك وايقظ قلوبنا ويسر حسابنا اللهم امييين

تالت نقطه بقى وهى مهمه اوى محتاجه وقفه مع نفسنا وتفكير كتير وهى اننا نراجع نفسنا فى كل موقف ووقت وخاصة نقارن نفسنا ايه

اللى اتغير فينا بعد رمضان وقبل رمضان ..ايه اللى حصل جوانا قربنا من ربنا اكتر؟؟ .. الحمد لله يبقى نستمر ونقرب اكتر واكتر انا مش هتكلم كل احد يعمل ايه علشان يقرب من ربنا لان كل شخص وليه افكاره وعباداته لكن لازم نقرب اكتر ومانبعدش كفايه اننا نحاسب نفسنا كل يوم على افعالنا واقوالنا وتصرفتنا...الحمد لله ذقنا حلاوة الايمان والقران والعباده والدعاء والدموع خشية من الله عالى ..يااااااااااااارب نستمر فى هذا الشعور الجميل

اخر حاجه ومعلش طولت عليكم بس بجد حبيت انقل اللى جوايا واللى اثر فيا علشان انا بحبكم كلكم واخواتى فى الله واتمنى نكون احسن ناس وخير امه..اخر حاجه هى قبل مانعمل او نكتب او نقول او نفكر فى اى حاجه ربنا شايفنا ..نشعر بوجوده.. واى حاجه هنعملها نعملها فى سبيل الله تعالى " من يتقى الله يجعل له مخرجا " .. ربنا يوفقكم ويكرمكم اجمعين ويعتق رقابنا من النار ...امييييييييييييين يارب العالمين

************************************************

نيجى للعيد بقى بجد اتمنى من كل قلبى يكون عيد سعيد علينا كلنا وعلى الامه الاسلاميه وتكون بالف خير وسعاده

ونبتديه بصلاة العيد اللى بجد احساسها بيبقى جميل اوى والمسلمين بيكبروا فى صوت واحد ..الله اكبر الله اكبر الله اكبر لا اله الا الله..الله اكبر كبيرا والحمد لله كثيرا وسبحان الله بكرة واصيلا

وبنقابل فيه كل قرايبنا وحبايبنا وزمايلنا ونعيد عليهم ونكون سعداء اننا شوفنا ناس كان بقالنا كتير مابنشوفهمش لان كل واحد بيبقى مشغول فى حياته

ويكون عيد مليان بالكحك والبسكوت والبيتفور والبمب والصواريخ والزمامير والبالونات والفرحه والسعاده ومننساش نفتكر الايتام وزيارة المرضى وفعل الخير علشان يبقى عيد سعيد علينا كلنا ...العيد بيجمعنا كمسلمين وكعائله وكأحبه فى الله و كاطفال وكل حاجه حتى الطبيعه بتبقى سعيده معانا

وكل عام واخواتى اللى بحبهم فى الله بألف خير

نور على نور

بسم الله الرحمن الرحيم

الله نور السموات والأرض مثل نوره كمشكاوه فيها مصباح المصباح فى زجاجه الزجاجه كأنها كوكب درى يوقد من شجرة مباركه زيتونة لا شرقيه ولا غربيه يكاد زيتها يضئ ولو لم تمسسه نار نور على نور يهدى الله لنوره من يشاء ويضرب الله الأمثال للناس والله بكل شئ عليم

صدق الله العظيم

سورة النور رقم الأيه 35

الرجاء التكمله حتى ايه 40 لأن معانيها جميله جدا ومفيده

الحمد لله

الحمد لله على كل شئ على نعمه وعلى ابتلاءاته وعلى كل حاجه حلوه و وحشه

ساعات الانسان بيمر بظروف صعبه ويتضايق ... ماهو لازم يتضايق مش بايده غصب عنه وخصوصا مايكون الشخص ده حساس
بس ده مش معناه انه مش راضى

انا مثلا كذا حاجه حصلتلى كانت تضايق بس من حكمة ربنا فيها قدرت اشوف حاجات ماكنتش شايفاها اعرف الناس كويس مين الكويس ومين الوحش وحكم كتييييييييييييير الحمد لله فهمتها بس انا للاسف مش هاقدر اكتبها لان انا مش عايزه اتكلم عن نفسى وخصوصا لما تكون حاجات شخصيه والمدونه دى انا بكتب فيها الحاجات اللى استفدت منها وبادعى من ربنا ان اللى يقراها يستفاد منها ولو حاجه انا فاهماها غلط يناقشنى فيها المهم

انا بكتب البوست ده علشان كل واحد اكيد بيمر عليه ظروف وحشه وصعبه بس المهم انه يفكر فيها وفى الظروف ده هيجد حكمة ربنا فيها واكيد كل حاجه ربنا يكتبهلنا وحشه او حلوه بتكون خير لينا حتى لو مش فى الوقت ده بيكتشف حكمته بعد كده

زى مثلا فى صورة الكهف من الايه59 حتى الايه 82 : سيدنا موسى لما قابل عبد من عباد الله اتاه رحمه من عنده وعلمه من لدنه علما ..سيدنا موسى اراد ان يتعلم منه وهذا الرجل قال له لاتستطيع معى صبرا وفعلا حصلت احداث ومواقف اى حد لو فكر فيها فى ساعتها هيقول ان ده اعمال شر ..لكن سبحان الله كل حاجه وليها حكمه وهذا الرجل قال لسيدنا موسى حكم ربنا فى هذه الاعمال والحمد لله كان كلها خير لانه ربنا اللى خلق عباده ورحيم بهم اكيد حتى لو ابتلاهم باى مكروه هيكون فى مصلحتهم او جزاءا لهم

واخيرا بجد عايزه اقول لاى حد يمر بمدونتى واذكر نفسى معاكم اننا نفكر فى حكم الله والمواقف اللى حوالينا ونتدبر معانى القرأن وندرك ونفهم وندى

ونقول الحمد لله على كل شئ فهو الذى اذا جعت يرزقنى ويطعمنى ويسقينى واذا مرضت فهو يشفينى وهو الذى يحيينى ويميتنى ولا يبقى غير وجهه له الاسماء الحسنى لا اله الا هو الحي القيوم مالك السموات والارض ورب العرش العظيم

يا ترى انا فين ؟؟

ازيكم كلكم بجد وحشتونى الفتره دى ومعلش انا يمكن بتأخر شويه علشان رمضان بقى شهر العبادات وانتوا عارفين وكل سنه وانتم طيبين

احنا انهارده اليوم السابع.. عدى على رمضان سبع ايام هما مش قليلين بس مش كتار لسه فاضل تلاته وعشرين يوم منهم تلات ايام رحمه وعشره مغفره وعشره عتق من النار

ياترى انا فين دلوقتى؟؟

ربنا رحمنى برحمته الواسعه التى وسعت كل شىء ولا غضبان عليا فى حاجه ؟؟؟

كل واحد يسأل نفسه ويحاسب نفسه كل لحظه وكل يوم

طيب ياترى كل واحد فين ؟ ومنزلته ايه دلوقتى؟؟

كل شخص اكيد هيحس بنفسه ويحاول يجاهد نفسه

ولو حاجه شايفها بتضيع وقت لازم نسيبها

يعنى مثلا انا هتكلم عن نفسى

النت ...ساعات بيضيع وقت كبير خلاص يبقى ان شاء الله هحاول اقلله ولما اقعد عليه هعمل حاجه تفيدنى وتفيد اللى حواليا

التلفزيون مثلا.. هنتقى برامج معينه مفيده فى اوقات معينه

افكر فى اى حاجه اعملها فى اى وقت فاضى مفيده حتى ولو التفكير فى الخير ..التفكير فى زيارة ايتام او اورام او اساعد حد او اى حاجه

ادعى للناس بظهر الغيب

اساعد اى حد فى تعدية الشارع ..اشيل اى اذى عن الطريق

اتامل فى الكون ايه المانع واى شخص رايح اى مشوار يتامل فى كون الله سبحانه وتعالى يسبح ..يشوف السماء بدون اعمده والبحر الواسع ومليان رزق والطيور اللى بتسبح ويقول سبحان الله انا مش هطول اوى فى النقطه دى لان لسه هنزلها بوست ان شاء الله

احاسب نفسى انا زعلت مين ومين زعلنى وهقدر اصالحه وهقدر اسامحه ولا لا واحاول افكر واراجع نفسى

وكل شخص يحاول يعيد نظر فى طريقه يشوف هو ماشى فين ورايح فين وعايز ايه

والباقى فى علم الغيب بس بجد

ياترى انا فين؟؟ وصلت فين فى رمضان ؟؟ الله اعلم

ادعو من الله ان يرحمنا ويقدرنا على فعل الخير والنيه الخالصه لوجهه ويعتق رقابنا اجمعين ياااااااارب العالمين ويغفر لى ولوالدى والمؤمنين والمؤمنات والمسلمين والمسلمات الاحياء منهم والاموات ....اللهم ما اميييين

لاتنسونى بالدعاء :)

رمضان كريم :)

رمضان كريم

الله.. يعنى رمضان كريم بالحسنات يعنى فرصه يعنى كل واحد يلحق يتقرب من ربنا يعنى مش صيام لا وصلاة تراويح واحساس جميل اوى وانت بتقف امام ربنا وكمان ناس بتشارك معاك وبتدعوا وبتذللوا لله اللى خلقنا ووهبلنا نعم كتيره

نعم لاتحصى

نظر وسمع ونعم كتييييييييييييييييييييييييييييييييييييير لو قعدنا نذكرها مش هنقدر نحصيها منها

نعمة الاسلام

نعمه جميله كل واحد يفخر اننا مسلمين متبعين دين افضل الخلق محمد عليه افضل الصلاة والسلام وان ربنا هو الرحمن الرحيم الملك القدوس الغفور وكل اسمائه الحسنى نفسى كلنا ندرك وانا كمان كل كلمه فى اسماء الله الحسنى هنحس بالفخر والرحمه ونحمد ربنا على النعمه الكبيره دى

ويا سلام لو حبيت حد فى الله او ادركت معنى اخوات فى الاسلام بجد فعلا احساس جميل

معلش انا ممكن اكون بطول شويه فى الكلام بس علشان اتكلم عن رمضان بلاقى مواضيع كتيره جميله لازم اقولها وكلها بردو بخصوص رمضان

رمضان مبارك

يعنى فيه بركه ..بركه فى الطعام وفى الحسنات وحب الخير والمشاركه

رمضان شهر القرأن

ادعو من الله ان انا مع كل خاتمه فى القران الكريم اتدبر معانى الايات اخد عظه وافهمه واعمل بيه و فى التراويح اجاهد الشيطان واركز فى كل كلمه فى الصلاة واحس بمعناها بجد واتقرب بها من ربنا اكتر واكتر

لان سبحان الله اكتر وقت تلاقى الواحد سرح فيه فى التراويح لازم نجاهد ونستعيذ من الشيطان فى كل سجده

رمضان والدعاء

الحمد لله فى رمضان الواحد بيحس ان الدعوه مختلفه ليها احساس مختلف انك قريب اوى من ربنا ..بتدعى ومتاكد انه بإذن الله هيستجيب لك وهيكرمك وبتدعى لاخوك فى ظهر الغيب ودى من الدعوات المستجابه

رمضان شهر الصيام

صيام عن الطعام والشراب وكل الجوارح وسبحان الله بحس ان والشخص صايم بيبقى عنده قوه كبيره اوى معنويه وماديه ((صوموا تصحوا ))

والدعاء عند انتهائنا من الصيام ( اللهم انى لك صمت وعلى رزقك افطرت اللهم ماتقبل صيامى يارب امين يارب العالمين )

فيها معانى جميله بتخلص النيه لربنا وتفطر على رزقه وبتدعوا وترجو ان هو يتقبل صيامك وبتبقى خايف وقلقان لتكون فى حاجه غضبت ربنا بيها ومايتقبلش بيها صيامك بس بترجع وتطمن لان هو الغفور والرحيم

بجد بيبقى نفسى كل ايام السنه تبقى رمضان بس اكيد فى حكمه علشان نشتقله ونقدر قيمته

رمضان وفعل الخير

يااااااااااااااااااااااا دى بقى نقطه بحبها اوى كل الناس عايزه تعمل خير وبتتسابق عليه

كلمات نفسى اعمل بيها وكل الناس كمان

نعفو ونتسامح ونصل الارحام ونساعد ونشتغل ونفكر ونشارك وندرك وندعو ونصلى وقيام الليل وتدبر القرأن ونسعد الناس ونزور الايتام

رمضان والفوانيس والانوار والزينه والمدفع والفرحه والسعاده واللمه والدعاء والخير هو ده رمضان

رمضان اوله رحمه واوسطه مغفره واخره عتق من النار

جمله جميله بس بخاف منها اوى بخاف احسن ماكونش من اللى ربنا يعتقوا رقابهم من النار يعنى خساره كبيره بجد احساس سئ اوى لو الشخص تخيله وادعو من الله انه يعتق رقابنا من النار

وكل سنه وانتم طيبين والى الله اقرب وادوم على الطاعه وفعل الخير وسعداء وعتقاء من النار

فى مدونه اشتركت فيها مع ناس كويسين جدا بحمد ربنا ان انا معاهم اسمها عذب الكلام

واول بوست كتبه محمد رحماك بجد كلمات معانيها جميله وخاصة ان رمضان اوله رحمه